Breska leikkonan Kate Beckinsale, þekkt fyrir hlutverk í kvikmyndum á borð við Pearl Harbour, The Aviator, Underworld og Serendipity, er mætt aftur til starfa eftir tæplega tveggja mánaða dvöl á sjúkrahúsi þar sem hún glímdi við óútskýrð veikindi.

Beckinsale, sem er í óðaönn að undirbúa sig fyrir nýjasta hlutverk sitt í spennumyndinni Stolen Girl, birti á dögunum nokkrar myndir á Instagram-reikningi sínum. Á myndunum sést leikkonan máta svartan síðkjól sem er hluti af leikgervi hennar. 

Beckinsale fékk mikla gagnrýni í kjölfar birtinganna en ótal fylgjendur leikkonunnar lýstu yfir áhyggjum af heilsufari hennar og sögðu hana vera orðna óeðlilega granna.

Leikkonan var snögg að eyða færslunum af Instagram en ákvað þó að svara fyrir sig í nokkrum orðum. Beckinsale viðurkenndi að hafa gengið í gegnum erfiða tíma undanfarna mánuði og sagði að sá tími hefði tekið sinn toll á andlegri og líkamlegri heilsu hennar.

Frétt af mbl.is

Kate Beckinsale lögð inn vegna mikilla verkja

Frétt af mbl.is

Svona heldur Kate Beckinsale sér í formi