Jóhann Gunnar Arnarson bryti, lífskúnstner og matgæðingur, betur þekktur sem Jói „butler“ eða bryti, starfaði lengi sem bryti á Bessastöðum ásamt eiginkonu sinni Kristínu Ólafsdóttur. Hann hefur því haldið ófáar veislurnar á Bessastöðum og þekkir vel til.

Hann er næsti viðmælandi matarvefsins til að upplýsa dagskrá sína á kjördag sem fram undan er á morgun, laugardaginn 1. júní næstkomandi. Hann heldur ávallt hátíðlega upp á kjördag og finnst fátt hátíðlegra þegar kosningarétturinn er nýttur eða haldið er upp á þjóðhátíðardaginn. Þá eru þjóðlegar íslenskar kræsingar honum efst í huga ásamt því að vera í sparifötunum.

Lýðræðisleg skylda að mæta og kjósa

„Mig langar bara að hvetja alla sem hafa kosningarétt, að bregða sér í sparifötin, og nýta sér þennan rétt, þó ekki sé nema af virðingu fyrir þeim sem börðust hart fyrir honum í gegnum aldirnar, og létu jafnvel lífið við að berjast fyrir þessum rétti. Það minnsta sem við getum gert er að mæta á kjörstað, það er hvor tveggja réttur okkar og jafnframt lýðræðisleg skylda að mæta og kjósa. Svo fylkjum við okkur á bak við hinn nýja forseta, eins og við höfum alltaf gert í gegnum tíðina að loknum kosningum,“ segir Jói.

Ætlar þú að mæta í kosningakaffi á kjördag?

„Nei, ég á ekki von á því að við gerum það.  Þar sem við hjónin vorum að vinna á Bessastöðum í áraraðir og það er enn þá hóað í okkur einstaka sinnum, þá höfum við ekki lýst yfir stuðningi fyrir frambjóðendur opinberlega og þar af leiðandi ekki mætt í kosningakaffi á kjördegi.“

Pönnukökur, flatkökur með hangikjöt og kleinur

Hvað finnst þér mest heillandi á kosningakaffihlaðborðið?

„Mjög oft eru kræsingar útbúnar af stuðningsfólki, og ákaflega gaman að sjá fjölbreytnina í veitingum, hugmyndaauðgi og sköpun, í bland við allt þetta þjóðlega sem við elskum öll eins og t.d. pönnukökur, flatkökur með hangikjöti, kleinur, vöfflur með sultu og rjóma, smurbrauðstertur, rjómatertur, perutertur og svo mætti lengi telja. Ef það er einhvern tímann réttur tími fyrir eitthvað íslenskt þá er það þegar þjóðin kemur saman að kjósa sér forseta sem er mikil lýðræðishátíð og svo á 17. júní,“ segir Jói.

Frétt af mbl.is

Peruterta, þessi gamla góða

Ertu búinn að ákveða matseðilinn fyrir kvöldverðinn á kjördag?

„Við hjónin erum að fara í afmælisboð til Ernu systur minnar, ég kannski fæ eitthvað að aðstoða hana við veitingarnar.  Þetta verður tjaldpartí með grillmat og öllu tilheyrandi, hreindýr, lamb og annað ljúfmeti.  Ef við værum heima, þá myndum við örugglega baka pönnukökur og hafa svo eitthvað klassískt í kvöldmatinn eins og léttreyktan lambahrygg eða lamba framhryggjarvöðva (prime) sem er í miklu uppáhaldi hjá okkur.“

Aldrei að vita nema maður smelli sé í spariskóna

Á að mæta í kosningapartí?

„Ég á heldur ekki von á því að við mætum á kosningavöku en sjáum hvað setur og hvernig landið liggur um kvöldið, ef okkar forsetaefni verður fyrir valinu.  Aldrei að vita nema að maður smelli sér þá í spariskóna og á kosningavöku,“ segir Jói og óskar landsmönnum öllum gleðilegrar lýðsræðishátíðar.