Ofurfyrirsæturnar og systurnar Gigi og Bella Hadid tóku höndum saman á dögunum og gáfu eina milljón bandaríkjadala til stuðnings við hjálparstarf á Gaza-ströndinni.

Talsmaður Hadid-systranna sagði peningana eyrnamerkta fjórum mannúðarsamtökum sem unnið hafa ómetanlegt starf á svæðinu og einbeitt sér að málum barna og fjölskyldna sem hafa orðið fyrir barðinu á stríðinu á Gaza, en tæplega átta mánuðir eru liðnir frá árás Hamas-samtakanna á Ísrael.

Systurnar, sem eiga palestínskan föður, hafa lýst yfir stuðningi við viðurkenningu á sjálfstæði Palestínu og hafa óspart reynt að vekja athygli á aðstæðum sem ríkja á svæðinu, bæði í eigin persónu og á samfélagsmiðlum.

Bella birti meðal annars myndir af sér á ströndinni í Cannes á dögunum. Á myndunum sést hún klædd í rauðan keffiyeh-kjól.