Tvítuga Stranger Things-stjarnan Millie Bobby Brown gekk á dögunum í það heilaga með fyrirsætunni Jake Bongiovi, syni tónlistarmannsins Jon Bon Jovi, við leynilega og lágstemmda athöfn.

Brown og Bongiovi trúlofuðu sig í apríl síðastliðnum eftir rúmlega tveggja ára samband. Þau tilkynntu gleðifregnirnar í færslu á Instagram með fallegri mynd þar sem Brown skartar glæsilegum demant á baugfingri. 

Frétt af mbl.is

Stranger Things-stjarna trúlofuð syni Jon Bon Jovi

Samkvæmt heimildum US Sun var athöfnin lágstemmd en rómantísk og voru aðeins þeir allra nánustu í fjölskyldu hjónanna viðstödd þegar þau fóru með heit sín. „Þau eru að skipuleggja stærri athöfn í Bandaríkjunum síðar á þessu ári en nú eru þau löglega gift og hafa lokið við alla pappírsvinnu,“ sagði heimildamaður fréttaveitunnar.

Meðal gesta í athöfninni var rokkarinn sjálfur, Jovi, ásamt foreldrum leikonunnar. Einnig er búist við að Jovi verði viðstaddur stærra brúðkaup hjónanna síðar á árinu, en Brown hefur gefið út að hann muni hins vegar ekki stíga á svið.