Allra augu beindust að bandaríska leikaranum Johnathan Schaech er hann gekk rauða dregilinn í borg englanna á laugardag.

Schaech, best þekktur fyrir leik sinn í kvikmyndinni That Thing You Do! frá árinu 1996, mætti skyrtulaus á viðburð Gurus Magazine sem haldinn var á The Godfrey-hótelinu í Los Angeles. Viðburðurinn var haldinn í tilefni af Pride-mánuði, sem nú stendur yfir í Bandaríkjunum. 

Leikarinn, 54 ára, stillti sér upp á rauða dreglinum og brosti óspart til ljósmyndara. Hann sýndi stoltur vel mótaða kviðvöðva sína og lét jakkann síga til að sýna viðstöddum upphandleggsvöðvana. 

Augljóst er að Schaech hefur tekið vel á því í ræktinni og æft af mikilli hörku enda er leikarinn í gríðarlega flottu formi og greinilega stoltur af árangrinum. 

Schaech, sem var kvæntur leikkonunni Christinu Applegate á árunum 2001 til 2007, mætti ásamt eiginkonu sinni, staðsetningarstjóranum Jamie Solomon, sem var einnig fáklædd undir jakkanum sínum.