Svo segir í tölvupósti starfsmanns matvælaráðuneytisins til Kristjáns Loftssonar, framkvæmdastjóra Hvals hf., sem honum barst í gær. Þar var svarað fyrirspurn Hvals vegna ummæla Bjarkeyjar Olsen Gunnarsdóttur matvælaráðherra í fyrirspurnatíma á Alþingi sem voru þau að fyrirtækið hefði frest til andmæla og að svara umsögnum 15 stofnana og hagaðila um umsókn fyrirtækisins til veiða á langreyðum til dagsins í gær en þá voru liðnir tveir dagar frá því Hval voru sendar umsagnirnar.

Frétt af mbl.is

Dregur til tíðinda á þriðjudag í hvalveiðimálum

Í póstinum gengst ráðuneytið við því að enginn frestur til svars hafi verið tilgreindur. Þar kemur og fram að gert sé ráð fyrir að ákvörðun um afgreiðslu umsóknar Hvals liggi fyrir í byrjun næstu viku, nema Hvalur óski eftir lengri tíma til andmæla.

„Ákvörðun verður ekki tekin fyrr en afstaða Hvals hf. liggur fyrir og ráðuneytið hefur farið yfir sjónarmið félagsins,“ segir í pósti ráðuneytisins.

„Þessir Vinstri grænu ráðherrar hafa gefið sér fjóra og hálfan mánuð til að svara umsókninni og nú á að keyra málið áfram á 100. Svona stjórnsýsla gengur engan veginn,“ segir Kristján.

„Borgararnir eru algerlega berskjaldaðir, ef hægt er að vinna hlutina með þessum hætti,“ segir hann.

Kristján segir að fyrirtækið muni nýta andmælarétt sinn, en þó skorti enn upplýsingar um hve langur hann sé. Það segir hann vera í stíl við annað.