Ekki er vitað hvernig Óli Björn Kárason og Jón Gunnarsson, þingmenn Sjálfstæðisflokksins, munu greiða atkvæði um vantrauststillögu á hendur Bjarkeyju Olsen Gunnarsdóttur matvælaráðherra.

Litlar líkur eru þó taldar á því að tillagan verði samþykkt.

Þingflokksfundur Sjálfstæðisflokksins var haldinn í gær og herma heimildir mbl.is að þingmenn Sjálfstæðisflokksins séu litlu nær um það hvernig Óli og Jón munu kjósa. Báðir hafa þeir verið ósáttir við framferði Bjarkeyjar í hvalveiðimálinu. 

Frétt af mbl.is

Jón orðlaus yfir ósvífni ráðherra

Hvorki Óli Björn né Jón hafa verið tilbúnir að tjá sig við ritstjórn mbl.is um það hvernig þeir hyggjast greiða atkvæði.

Umræða á Alþingi upp úr kl. 11

Tillagan verður tekin til umræðu á Alþingi upp úr klukkan 11 í dag og svo er gert ráð fyrir því að kosið verði um hana um hádegisbilið.  

Hildur Sverrisdóttir, þingflokksformaður Sjálfstæðisflokksins, sagði í samtali við Vísi í gær að tillagan yrði felld. Þá hefur Ingibjörg Isaksen, þingflokksformaður Framsóknar, sagt í samtali við mbl.is að allir þingmenn Framsóknar muni verja Bjarkeyju vantrausti. 

Frétt af mbl.is

Framsóknarmenn munu verja matvælaráðherra

Stjórnarandstaðan styður tillöguna

Miðflokk­ur­inn lagði fram til­lög­una og hafa forsvarsmenn allra stjórnarandstöðuflokka greint frá því að þeir muni styðja hana.

Ástæða tillögunnar er fram­ganga Bjarkeyjar í hval­veiðimál­inu, en vegna óvenju langs tíma til leyf­is­veit­ing­ar af hálfu mat­vælaráðuneyt­is­ins stefn­ir allt í að eng­in vertíð verði hjá Hvali hf. í sum­ar.