Les­end­ur eru dug­leg­ir að leita ráða um allt milli him­ins og jarðar. Auðvitað er ekki hægt að svara öll­um spurn­ing­um en ég hef þó reynt að gera það eft­ir bestu getu. Á dögunum kom spurning frá konu sem velti fyrir sér hvort hún gæti farið í beige-litaðar sokkabuxur við opna sandala. 

Hæ hæ. 

Ég er að fara í fína veislu í sumar. Þetta er smá flókið því fyrrverandi maðurinn minn verður í veislunni með nýju konunni sinni. Hún er svona sólbrún og sæt og miklu yngri en við. Við erum bæði um sextugt og ég ætlaði að vera djarfari en vanalega og mæta berleggjuð. Hann elskaði alltaf á mér fótleggina og því langar mig að ögra honum með þessum hætti. Vandamálið er að núna finnst mér ég vera orðin svolítið þreytt og gömul og jafnvel klaufaleg. Ég var búin að kaupa mér Clarks-sandala því þeir eru þægilegir en ég er frekar mikil lumma þegar ég er komin í sandalana og í beige-sokkabuxur. Hvað myndir þú gera í þessu? Skipta um skó eða hætta við að fara? 

Kveðja, 

J

Það er yfirleitt gert ráð fyrir því að konur séu með berar tær í opnum skóm. Omoda/Unsplash

Sæl J. 

Þú mátt alls ekki hætta við að fara í veisluna því þá ertu búin að tapa. Það er svolítið eins og hrapa niður stóra stigann í Slönguspilinu og vera aftur á byrjunarreit. Þú þarft að vera þannig búin að þú upplifir þig alveg löðrandi af sjálfsöryggi og þokka. 

Varðandi sandala og sokkabuxur þá eru nokkrar óskrifaðar reglur. 

Oftast gera skóhönnuðir ráð fyrir að fólk sé ekki í sokkum eða í sokkabuxum í opnum skóm. Í einstaka tilfellum getur það gengið ef sokkabuxurnar og skórnir eru í sama lit eða hluti af einhverju heildarútliti sem er búið að pródúsera vel. Auk þess skiptir máli hvaða fatnaður er valinn við opna skó og sokkabuxur.

Netasokkabuxur hafa oft reynst konum vel sem vilja svindla aðeins á þessu. Þær geta alveg gengið við opna skó og þá aðallega beige-litaðar netasokkabuxur.

Svo má velta fyrir sér hvort þú eigir aðra skó til að nota í þessari fínu veislu. Kannski gætir þú skipt Clarks-sandölunum út fyrir hefðbundna háhælaða skó og náð að vera í sokkabuxum við dressið. Ég veit reyndar ekki hvernig sandalarnir líta út en það er líklegra að þú upplifir þig alveg löðrandi í háhæluðum skóm með pinnahæl. 

Klassískir háhælaðir skó með pinnahæl gera oft miklu meira fyrir heildarmyndina en sandalar. Fótleggurinn virkar lengri en um leið og skór eru með ól um ökklann þá klippist  af fótleggnum. 

Aðalmálið er þó að þér líði vel í veislunni og getir notið þess að vera glöð og skemmtileg og það sé ekkert að eyðileggja gleðina eins og áhyggjur af berum fótleggjum. Þegar þú ert búin að finna út úr þessu skómáli þá þarftu að komast á þann stað að þér sé alveg sama um einhvern fyrrverandi karl og hans fylgifiska. Það er allt of plássfrekt að láta fyrrverandi maka leigja frítt í hausnum á sér og best að reyna að segja þeirri leigu upp sem fyrst. Helst áður en sumarveislan hefst. 

Gangi þér vel með þetta allt!

Liggur þér eitthvað á hjarta? Þú getur sent spurningu HÉR. 

Hér eru sokkabuxur við skó með opinni tá. Það gengur í þessu tilfelli því skórnir, sokkabuxurnar og kjóllinn eru öll í svipuðum lit. GettyImages/Unsplash

Hér má sjá háhælaða skó sem eru með bandi yfir ristina og bandi utan um ökklann. Ef þú vilt láta fótlegginn virka styttri þá gætir þú farið í slíka skó. Eugenivy/Unsplash