Uppskriftir | 5. júlí 2024

Graskersúpan sem jafnar blóðsykurinn

Elísabet Reynisdóttir næringarfræðingur gefur uppskrift að girnilegri graskerssúpu sem er í miklu uppáhaldi hjá henni. Uppskriftin er úr bókinni Þú ræður sem Elísabet gaf út á dögunum en þar er að finna fróðleik um bætt mataræði, betri svefn og hvernig megi minnka bólgur í líkamanum.

Graskersúpan sem jafnar blóðsykurinn

Uppskriftir | 5. júlí 2024

Elísabet Reynisdóttir segir að graskerssúpa hafi góð áhrif á blóðsykurinn. Samsett mynd

„Ég mæli með því að nota hinn helminginn af graskerinu sem meðlæti með máltíðum næstu daga, til dæmis með því að skera graskerið í teninga og steikja í olíu á pönnu eða í ofni, eða með því að mauka í graskersmús. Það má líka útbúa súpu úr öllu graskerinu núna, og frysta það magn sem verður afgangs eftir þessa máltíð. Hálft meðalstórt grasker á að duga fyrir einn í tvær máltíðir,“ segir Elísabet

Graskerssúpan er ljúffeng og nærandi. Jezebel Rose/Unsplash

Graskerssúpa Elísabetar Reynis

1 grasker (butternut squash)
1-2 bollar vatn, fer eftir stærð graskers
1-2 stk. grænmetisteningar, lífrænir
¼ tsk. cayenne pipar, eða eftir smekk
salt og svartur pipar

Aðferð:

Graskerið bakað heilt í ofni við 180°C í 1og ½ klst.
Skorið í tvennt og fræin fjarlægð.
Aðeins annar helmingurinn af graskerinu fer í súpuna, hinn lagður til hliðar.
Graskerið er skorið í bita og maukað í blandara ásamt hæfilegu magni af vatni (súpan á ekki að vera of þykk).
Fært yfir í pott þar sem grænmetisteningi er bætt saman við.
Hitað að suðu. Kryddað með cayenne pipar, salti og pipar og skreytt með fersku kóríander, rétt áður en súpan er borin fram.