Keir Starmer, leiðtogi Verkamannaflokksins, verður næsti forsætisráðherra Bretlands. Verkamannaflokkurinn vann stórsigur í þingkosningunum sem fóru fram í Bretlandi í gær. 

Síðustu fjórtán ár hefur Íhaldsflokkurinn, sem er hægriflokkur, farið með völd í Bretlandi. Rishi Sunak, forsætisráðherra og leiðtogi íhaldsmanna, hefur óskað Starmer til hamingju með góða kosningu og lofað friðsamlegum valdaskiptum.

Sunak hefur óskað Starmer til hamingju. AFP/Darren Staples

Star­mer hef­ur verið á þingi í níu ár en starfaði þar á und­an sem mann­rétt­inda­lögmaður og sak­sókn­ari. Hann er 61 árs gam­all og verður elsti maður­inn til þess að taka við embætti for­sæt­is­ráðherra í Bretlandi í hálfa öld.

Frétt af mbl.is

Hver er Keir Starmer?

Á eftir að telja öll atkvæði

Starmer ávarpaði stuðningsmenn sína í nótt þegar ljóst var að Verkamannaflokkurinn hefði unnið stórsigur. Hann lofaði breytingum og sagði meðal annars: „Landið í fyrsta sæti, flokkurinn í annað sæti.“

Enn hafa ekki öll atkvæði verið talin en eins og staðan er núna er Verkamannaflokkurinn með 408 þingsæti og Íhaldsflokkurinn með 115. Alls eru þingsætin á breska þinginu 650 talsins.