Andrea Lawful-Sanders útvarpsfréttamaður hefur sagt upp störfum eftir að í ljós kom að spurningarnar sem hún lagði fyrir Joe Biden Bandaríkjaforseta voru fyrirfram ákveðnar af kosningateymi Bidens.

Dagblaðið New York Times greinir frá þessu.

Lawful-Sanders starfaði fyrir WURD-útvarpsstöðina í Pennsylvaníu. 

Umrætt viðtal var það fyrsta sem skipulagt var eftir kappræður Bidens við mótframbjóðandann Donald Trump. 

Frétt af mbl.is

Trump þykir hafa staðið sig betur en Biden

Frétt af mbl.is

Biden viðurkennir að hafa klúðrað kappræðunum

Ætla ekki að senda spurningar aftur

Lawful-Sanders tók viðtal við Biden í síðustu viku og spurði hann fernra spurninga en þær voru meðal átta spurninga sem kosningateymið sendi henni.

Spurningarnar lutu að því hvað væri í húfi í kosningunum, árangri hans og frammistöðu í kappræðum og loks um hvaða skilaboð hann hefði til óákveðinna kjósenda.

Lauren Hitt, talsmaður kosningateymis Bidens, sagði á laugardag að teymið ætlaði ekki að senda aftur spurningar á fréttamenn fyrir viðtöl.