Uppskriftir | 10. júlí 2024

Orkumiklir og góðir bananabitar í nestisboxið

Helga Magga, heilsumarkþjálfi og áhrifavaldur með meiru, hittir ávallt í mark með sínum einföldu og frábæru uppskriftum sem allir geta gert. Nú eru það nestisbitarnir sem eru henni hugleiknir enda elskar hún fátt meira en að fara í fjallgöngur með vinkonum sínum eins og komst í fréttirnar í gær.

Orkumiklir og góðir bananabitar í nestisboxið

Uppskriftir | 10. júlí 2024

Helga Magga er mætt með nestisbitann, þetta er orkumikill og góður bananabiti sem allir krakkar eiga eftir að elska. Samsett mynd

Þessir nestisbitar eru líka svo sniðugir fyrir krakka í nesti þegar þau eru á námskeiðum í sumar og fyrir á fótboltamótin svo fátt sé nefnt. Það skiptir máli að hafa bitana sem orkuríkasta og það eru þessir bananabitar svo sannarlega. Svo eru þeir líka fullkomnir í millimál fyrir unga sem aldna. Sjáið myndbandið frá Helgu Möggu hér fyrir neðan, tekur enga stund að búa til og enn styttri tíma að borða.

View this post on Instagram

A post shared by Helga Magga I Macros næringarþjálfun (@helgamagga)

Bananabitar Helgu Möggu

2 þroskaðir bananar (um það bil 230 g)
200 g haframjöl
30 g hnetusmjör
30 g akasíuhunang
1 tsk. matarsódi og smá salt
200 g grísk jógúrt
100 ml léttmjólk
Súkkulaðidropar eftir smekk, gott að nota Kaju súkkulaðidropana, sem eru 70% súkkulaði

Aðferð:

Byrjið á því að hita ofninn í 180°C hita.
Blandið öllu hráefninu saman í skál.
Setjið síðan bökunarpappír í meðalstórt eldfast mót.
Setjið deigið ofan í og sléttið úr því.
Stráið súkkulaðidropum yfir eftir smekk og ástríðu.
Setjið inn í ofn og bakið við 180°C hita í um það bil 40 mínútur.
Síðan er lag að skera kökuna í ferkantaða, hæfilega stóra bita, þegar hún hefur kólnað og setja í nestisbox fyrir þann sem ætlar að njóta.