Bandaríska leikkonan Barbie Ferreira hefur verið sökuð um að notfæra sér sykursýkislyfið Ozempic.  

Leikkonan, þekktust fyrir hlutverk sitt sem Kat Hernandez í HBO-þáttaröðinni Euphoria, vakti sérstaka athygli fyrir kvenlegan vöxt sinn og ávalar línur þegar hún braust fram á sjónarsviðið fyrir nokkrum árum og hefur verið öflugur talsmaður jákvæðrar líkamsímyndar alla daga síðan.

Ferreira, 27 ára, kom því mörgum á óvart á fimmtudag þegar hún birti myndir af sér á samfélagsmiðlasíðunni Instagram. Breytt­ur vöxt­ur leikkonunnar kem­ur ber­sýni­lega í ljós á myndunum og er hann allt annar en á myndum sem hún deildi með fylgjendum sínum aðeins örfáum vikum áður. Netverjar segja hana hafa nýtt sér grenningarmátt Ozempic.

Ný þáttaröð af Euphoria er væntanleg á næsta ári. Ferreira mun ekki snúa aftur í hlutverki Hernandez. Í viðtali við tímaritið Vanity Fair, sem birtist á síðasta ári, viðurkenndi leikkonan að vilja ekki leika hlutverk „feitu vinkonunnar“.