Donald Trump, forsetaframbjóðandi repúblikana, kveðst tilbúinn í kappræður við Kamölu Harris, varaforseta Bandaríkjanna, oftar en einu sinni.

„Ég held að hvort sem að þú ert frambjóðandi demókrata eða frambjóðandi repúblikana, þá ber þér skylda að mæta í kappræður,“ sagði hann í samtali við blaðamenn í gær.

Politico greinir frá.

Frétt af mbl.is

Trump segir auðveldara að vinna Harris en Biden

Ekki spenntur fyrir ABC en samt reiðubúinn

Joe Biden og Donald Trump mættust í kappræðum 27. júní og í kjölfarið tók við atburðarás sem endaði þannig að Biden dró framboð sitt til baka og lýsti yfir stuðningi við Harris.

Er hún kominn í framboð og mun líklega hljóta útnefningu demókrata á landsfundi í næsta mánuði.

Frétt af mbl.is

Ótrúleg atburðarás: 25 dagar frá kappræðum

Biden og Trump höfðu samþykkt að mætast aftur 10. september á sjónvarpsstöð ABC. Trump kveðst reiðubúinn í þær kappræður gegn Kamölu þrátt fyrir það hann sé ekki spenntur fyrir ABC.

Hann hefur áður nefnt að sjónvarpsstöðin Fox News ætti að fá að halda kappræður, eins og hefur verið gert áður.

Til í fleiri en eina kappræður

Hann segir ABC vera „brandara“ og kvaðst hafa horft á sjónvarpsstöðina á dögunum og talið sjónvarpsstöðina halla undir demókrata. Þrátt fyrir það telji hann forsetakappræður skipta meira máli.

Þá kvaðst hann vera til í að mæta Harris oftar en einu sinni í kappræðum.

Kosningateymi Harris hefur ekki svarað fyrirspurn Politico um mögulegar kappræður.

Frétt af mbl.is

Hver er Kamala Harris?