Bollywood-leikarinn Ranbir Kapoor greindi frá því í viðtali nýverið að hann hafi kynnst eiginkonu sinni, leikkonunni Aliu Bhatt, þegar hún var aðeins níu ára gömul. Sjálfur var hann tvítugur að aldri þegar þau kynntust. Kapoor var gestur í hlaðvarpsþætti Nikhil Kamath, People by WTF, þar sem hann rifjaði meðal annars upp fyrstu kynni hjónanna. 

„Við fórum bæði í áheyrnarprufur fyrir kvikmyndaverkefni sem fjallaði um barnahjónabönd. Þar kynntumst við fyrst,“ sagði Kapoor. „Þetta hljómar kannski illa, en ég vissi strax að hún væri einstök.“

Kapoor, 41 árs, og Bhatt, 31 árs, endurnýjuðu kynni sín mörgum árum síðar er þau unnu að Bollywood-myndinni Brahmāstra: Part One — Shiva. Það var þá sem ástin kviknaði. 

Hjónin, sem eru í dag meðal frægustu og launahæstu leikara í Bollywood, giftu sig í glæsilegri athöfn í borginni Mumbai á Indlandi árið 2022. Þau eiga eina dóttur, Raha, sem kom í heiminn sama ár.