Margir halda að best sé að hreyfing sé af hinu slæma þegar fólk finnur til í hnjánum. Sérfræðingar mæla hins vegar með því að fólk leggi áherslu á góðar æfingar til þess að styrkja hnéin. 

Það að hreyfa hné eins mikið og mögulegt er er mikilvægt til þess að tryggja gott blóðflæði um svæði og tryggja að næringarefni berist þangað. Það viðheldur virkni hnjánna. Nýleg rannsókn í Pain Journal leiddi í ljós að mikill meirihluti þeirra sem þjást af slæmum hnjám forðist að hreyfa sig og halda að hreyfing sé skaðleg fyrir hnéin. „Það er best að hreyfa hnéin á marga mismunandi vegu,“ segir Dr. Dalton Wong í viðtali við The Times.

Nokkur góð ráð:

Sex þúsund skref á dag að lágmarki

Rannsóknir hafa sýnt að fólk á miðjum aldri með slæm hné voru 40% ólíklegri til þess að finna til óþæginda í hnjánum ef þau gengu reglulega samanborið við fólk sem gerði það ekki.

Það að ganga á hverjum degi virðist hjálpa mikið til við að þjálfa hnéin og koma í veg fyrir frekari meiðsli eða versnandi ástand.

„Fólk ætti að ganga, sérstaklega ef hnéin eru ekki slæm alla daga. Sex þúsund skref á dag ætti að vera lágmarksviðmið fyrir hvern dag. Slík hreyfing gæti haldið hnjánum góðum þannig að maður geti viðhaldið getunni til þess að ganga upp stiga svo dæmi sé nefnt,“ segir Wong.

Lyftu lóðum

Fólk heldur stundum að það að lyfta lóðum setji óþarfa álag á liðina þegar sannleikurinn er sá að slík þjálfun geti einnig verndað þá. Rannsóknir hafa sýnt að styrktarþjálfun hafi jákvæða fylgni við betri hné. Því fyrr sem maður byrjar því betra.

Farðu í sund

Sund er líkamsrækt sem er sérstaklega góð fyrir liðina. Vatnið veitir líkamanum vissan stuðning og styður við mjúkar hreyfingar. Rannsóknir hafa sýnt að þeir sem synda eru 37% ólíklegri til þess að finna fyrir miklum sársauka í hnjám. „Sund er frábært til þess að byggja upp vöðva án þess að þurfa að lyfta lóðum,“ segir Wong.

Stattu á öðrum fæti

Jafnvægi skiptir líka máli þegar kemur að hnjánum. „Eftir því sem við eldumst þá minnkar hæfileiki okkar til þess að halda jafnvægi. Því verr sem okkur gengur að halda jafnvægi því meiri líkur á því að hnéin verði fyrir skaða. Það er hægt að þjálfa jafnvægið með því að standa á öðrum fæti, til dæmis þegar maður er að bursta tennurnar.“