„Við hefðum ekki getað beðið um betra upphafskvöld,“ segir Steinþór Helgi Arnsteinsson, skipuleggjandi Innipúkans, um hátíðarhöldin hingað til.

Steinþór er upptekinn með viðskipti á fatamarkaði Innipúkans þegar blaðamaður mbl.is nær tali af honum en hann gefur sér tíma til að segja frá vel lukkaðri hátíð. Nefnir hann að selst hafi upp á hátíðarhöld gærkvöldsins og að skipuleggjendur Innipúkans séu einstaklega sáttir með hvernig hátíðin fer af stað.

Tónleikar Innipúkans eru bæði í Gamla bíói og á Röntgen. Ljósmynd/Aðsend

Segir aðalkvöldið á sunnudeginum

Spurður hvernig stemningin sé fyrir tónleikunum nú í kvöld og annað kvöld svarar Steinþór: „Við getum kallað þetta þjófstart í gær, upphitun í kvöld og svo er aðalkvöldið á morgun.“

Steinþór lýsir því að um þessar mundir sé Ingólfsstræti fyrir framan Gamla bíó troðfullt af fólki vegna fatamarkaðs Innipúkans. Nefnir hann að götunni sé alltaf lokað fyrir utan samkomuhúsið í kjölfar hátíðarinnar og stemningin sé einstaklega góð.

Á Ingólfsstræti fá gestir Innpúkans tækifæri til að njóta smá útiveru. Ljósmynd/Aðsend

Innipúkar vilji líka njóta sólarinnar

„Þó við séum innipúkar þá viljum við samt geta verið aðeins úti og notið sólarinnar,“ segir hann og bætir við að á mörkuðum Innipúkans sé alltaf markmiðið að mynda góða stemningu.

Tekur hann fram að Innipúkinn standi ekki bara fyrir fatamarkaði, heldur líka myndlistarmarkaði, sem einnig verður haldinn utandyra á morgun.