Lögreglustjórinn í Vestmannaeyjum segir ekkert stórvægilegt hafa komið á borð lögreglu í nótt. Eitthvað var þó um ólæti og slagsmál og reiknar hann með að fimm manns hafi verið færðir í fangaklefa í heild.

Karl Gauti Hjaltason lögreglustjóri upplýsir í samtali við mbl.is að nóttin hafi gengið ágætlega í Eyjum. 

Segir hann að eitthvað hafi verið um pústra, ólæti og ölvun og að í morgun hafi þrír einstaklingar setið í fangaklefa.

Nefnir hann þá að 2-3 líkamsárásir hafi átt sér stað í nótt og var einn einstaklingur í klefa vegna einnar þeirra. Í heild reiknar hann með að fimm manns hafi verið teknir af lögreglu undanfarin sólahring og færðir í fangaklefa.

Tekur lögreglustjórinn þá fram að fá fíkniefnamál hafi komið upp.

Viðbúnaður við hvassviðri í gangi

Um veðrið á eyjunni segir Karl Gauti að sól sé á lofti en hvasst og búist sé við því að það hvessi með deginum.

Segir hann að mikill viðbúnaður hafi verið vegna hvassviðrisins.

Frétt af mbl.is

Setja upp tjaldsúlur í úrhelli og „suðaustanógeði“

„Við fengum tilkynningu um að það væri búist við hvassviðri í dag og menn voru í gær að festa tjöld betur en venjulega,“ segir lögreglustjórinn og bætir við: 

„Þannig við erum svona að vona að við sleppum í dag við meiriháttar tjón á tjöldum.“

Frétt af mbl.is

Fjölmennt í föstudagsbrekkunni