Við Goðaland í Fossvogi er að finna einstaklega eigulegt endaraðhús á einni hæð. Húsið var reist 1968 og er 168 fm að stærð. Búið er að endurnýja húsið heilmikið og hefur verið nostrað við hvert smáatriði.

Kannski má segja að það eina sem er upprunalegt í húsinu sé arininn en hann minnir á hina góðu stemningu sem ríkti byggingarárið.

Stórt borðstofuborð prýðir rýmið. Stóllinn við endann hægra megin er frá VIPP og setur svip sinn á uppsetninguna.

Horft úr eldhúsinu inn í stofu og borðstofu.

Horft inn í eldhús sem snýr í norður.

Í eldhúsinu eru dökkar innréttingar úr bæsaðri eik með dökkum granítsteini. Eldhúsið er opið inn í stofu og borðstofu og er fallegt fiskibeinaparket á gólfinu. Veggir í alrýminu eru hvítmálaðir og því má segja að heimilið sé bjart og stílhreint. 

Úr stofunni er gengið niður nokkrar tröppur og inn í garðskála með þaki en úr honum er hægt að labba beint út í garð sem státar af feiknarstórum palli með heitum potti. 

Garðskálinn hefur verið endurnýjaður mikið og er nú góð viðbót við húsið.

Tveir svanir eftir Arne Jacobsen kúra á ljósri mottu í stofunni.

Eigendur hússins eru Stefán Örn Arnarson og Kristrún Helga Hafþórsdóttir en þau festu kaup á húsinu 2019 og gerðu það upp með þessum smekklega hætti. 

Sjá nánar á fasteignavef mbl.is: Goðaland 8

Blár sófi og glerborð frá Noguchi.

Pallurinn er nýlegur og mjög vel hannaður.

Um er að ræða endaraðhús við Goðaland.