Lögreglan víða um land segir verslunarmannahelgina hafa gengið vel. Helst virðist hafa verið eitthvað um ölvunarakstur víða um land. Hvetur lögreglan fólk til að fylgjast vel með veðri í dag og fara varlega heim en varað hefur verið við aurskriðum og mögulegu grjóthruni á Vestfjörðum.

Frétt af mbl.is

Viðvaranir í gildi víða

Sveinn K. Rúnarsson, yfirlögregluþjónn lögreglunnar á Suðurlandi, segir í samtali við mbl.is að lítið hafi verið um afskipti lögreglu af fólki á viðburðum Suðurlandsins. Sinnt hafi verið hefðbundnu eftirliti og allt hafi gengið mjög vel.

Hvetur hann þá fólk til að gefa sér tíma fyrir heimför og fara varlega.

Lögreglan hvetur fólk til að flýta sér hægt og fara varlega heim. mbl.is/Eggert Jóhannesson

Þrjú afskipti á Austurlandi

Hjalti Bergmar Axelsson, aðstoðaryfirlögregluþjónn lögreglunnar á Austurlandi, segir helgina hafa gengið mjög vel.

„Það voru þrjú afskipti sem tengdust svona einhverju skemmtanahaldi. Of ungur aðili inni á skemmtun og eitt vopnalagabrot, ungur aðili með hníf á sér sem að var bara afgreitt á staðnum. Svo örlítið aðstoðarverkefni vegna ölvunar en svo bara ekki neitt stórkostlegt,“ segir Hjalti.

Nefnir hann að einn hafi verið tekinn fyrir ölvunarakstur og átta fyrir hraðakstur og hvetur fólk á heimferð til að flýta sér hægt.

Varar við framúrakstri

Ásmundur K. Ásmundsson, yfirlögregluþjónn lögreglunnar á Vesturlandi, segir að helgin hafi að mestu leyti farið þar þokkalega fram. Eitthvað hafi þó verið um ölvunar- og fíkniefnaakstur, sem og hraðakstur.

Þá hafi verið yfirfullt á öllum tjaldstæðum á Vesturlandi.

„Það var töluverð ölvun í Húsafelli. Það var alveg pakkfullt þar og þurfti að vísa fólki frá,“ segir Ásmundur.

Þá hafi orðið bílvelta á Hítardalsvegi á laugardag og einn sviptur ökuréttindum í gær og grunaður um að keyra ölvaður.

Fyrir heimferð fólks segir Ásmundur að verið sé búið að benda fólki á að róa sig niður í göngunum.

„Það er keyrt hægt þar núna af því það er komin þessi meðalhraðamæling og við sjáum að hraðinn hefur lækkað mikið en þá náttúrulega fer fólk að reyna að sperra sig fram úr,“ segir yfirlögregluþjónninn og bætir við.

„Þessi slys sem við fáum á þjóðveginum sem eru alvarleg, það er þegar bílar fara framan á hvor aðra. Það getur verið tengt ýmsu af hverju það gerist en oft er það framúraksturinn.“

Mögulegar aurskriður og grjóthrun á Vestfjörðum

Helgi Jensson, lögreglustjóri á Vestfjörðum, segir helgina hafa verið fína og rólega þar á landi þó alltaf komi upp einhver smámál.

Segir hann ölvunarakstur hafa verið eilítið meiri en á venjulegri helgi en að við því hafi verið búist. Að öðru leyti hafi gengið vel og verið stórslysalaust hjá lögreglunni.

Segir hann mjög hvasst um þessar mundir og rigningu spáð og nefnir Helgi að búið sé að vara við aurskriðum á Vestfjörðum, sérstaklega á Ströndum, og mögulegu grjóthruni líka.

Hvetur Helgi því fólk til fylgjast vel með spánni og veðri í umferðinni.

Frétt af mbl.is

Veðurstofan varar við auknum líkum á skriðuföllum