Uppskriftir | 8. ágúst 2024

Alvöru djöflaterta með smá veseni

Það jafnast fátt á við góða djöflatertu en til þess að hún verði sem best skiptir máli að hræra hana saman í réttri röð og koma fram við hráefnin af virðingu. Ekki henda öllu í skál og brussast áfram. Það er til dæmis alveg stranglega bannað að setja hrærivélina á hæsta styrk og sjá hveitið og sykurinn þyrlast upp um alla veggi.

Alvöru djöflaterta með smá veseni

Uppskriftir | 8. ágúst 2024

mbl.is/MMWJ

Góð lyfting

Hvað er hægt að gera til þess að kökur lyftist vel? Eitt gott ráð er að aðskilja eggin og hræra þau í sitthvoru lagi. Hræra eggjarauðurnar þannig að blandan verði fallega gul og rjómakennd og stífþeyta svo eggjahvíturnar. Eggjahvítur og eggjarauður fara ekki á sama tíma út í deigið og mikilvægt er að setja stífþeyttu eggjahvíturnar varlega út í svo eiginleikar þeirra tapist ekki. Einnig skiptir máli að aðskilja eggin þegar þau eru köld og byrja ekki að baka kökuna fyrr en eggin hafa staðið á borði og séu við stofuhita þegar baksturinn hefast. Mjög bráðlátir bakarar eiga mjög erfitt með þetta skref í ferlinu.

Kaka nokkurra hrærivélaskála

Í hvert skipti sem ég baka þessa dýrindis djöflatertu þá rifjast það upp fyrir mér hvað það væri mikill lúxus að eiga allavega þrjár hrærivélaskálar - ekki bara eina. Þegar kakan fer inn í ofn er ég oftast búin að steingleyma því hvað þrjár hrærivélaskálar væru mikill munaður og það rifjast ekki upp fyrr en við næsta bakstur. Einhvern veginn man ég aldrei eftir þessum hrærivélaskálaskorti á venjulegum degi. Svona getur mannshugurinn verið ófullkominn og glundroðakenndur. Það er þó eitt sem er alls ekki ófullkomið og það er þessi djöflaterta, þar að segja ef fólk fer nákvæmlega eftir uppskriftinni og gefur sér tíma til að njóta augnabliksins. Góða skemmtun í eldhúsinu!

Djöflaterta með veseni

3 bollar hveiti
1 1/2 tsk. lyftiduft
1 1/2 tsk. matarsódi
1/2 tsk. salt
3/4 bolli ósaltað smjör
2 bollar sykur
3 egg
2 og 1/2 súkkulaðiplötur
2 bollar mjólk
1 1/2 tsk. vanilludropar

Aðferð:

Stillið ofninn á 180°.
Aðskiljið eggin.
Bræðið súkkulaðið yfir vatnsbaði.
Blandið saman þurrefnum í litla skál.
Setjið smjörið í hrærivélaskál og þeytið þangað til það er orðið mjúkt.
Bætið sykrinum út í og þeytið þangað til blandan er létt og ljós en það tekur yfirleitt í kringum þrjár mínútur.
Takið aðra skál og þeytið eggjarauðurnar í um það bil tvær mínútur eða þangað til blandan er orðin fallega gul.
Bætið eggjarauðunum út í smjörið og sykurinn og bætið bráðna súkkulaðinu út í og blandið þangað til áferðin er orðin falleg.
Bætið þurrefnum út í í þremur hlutum og hrærið mjög varlega. Það má alls ekki ofhræra þetta saman.
Bætið mjólkinni út í.
Stífþeytið eggjahvíturnar og bætið varlega út í deigið.
Setjið deigið í tvö stór kökuform og bakið í 30-35 mínútur eða þangað til kakan er bökuð í gegn.

Súkkulaðismjörkrem

350 g ósaltað smjör
2 tsk. mjólk
2 og 1/2 súkkulaðiplata
1 tsk. vanilludropar
590 g flórsykur

Aðferð:

Hitið súkkulaðið yfir vatnsbaði og látið kólna í 10-15 mínútur.
Setjið smjörið í hrærivélaskál og þeytið þangað til það er orðið mjúkt. Þetta tekur um það bil þrjár mínútur.
Mjólk bætt út í og allt hrært vel saman.
Bættu súkkulaðibráðinni út í og hrærðu varlega í um það bil tvær mínútur.
Bættu vanilludropnum út í.
Settu flórsykurinn út í og hrærðu saman þangað til kremið fær fallega áferð. Best er að setja það á kökuna þegar hún er orðin köld.
Þegar kremið er komið á er fallegt að raspa súkkulaði yfir kökuna til að búa til fallegri áferð.