Ríkislögreglustjóri keypti 175 skothelda hjálma fyrir leiðtogafund Evrópuráðsins sem haldinn var í Hörpu á síðasta ári.

Kostnaður við hjálmana og búnað þeim tengdum nam 195.475 pundum, eða um 34 milljónum króna ef miðað er við gengið í janúar 2023.

Þetta kem­ur fram í sölu­reikn­ing­um sem rík­is­lög­reglu­stjóri hef­ur veitt mbl.is aðgang að eft­ir að hafa upp­haf­lega hafnað því að birta gögn­in.

Úrsk­urðar­nefnd upp­lýs­inga­mála skar úr um málið og var rík­is­lög­reglu­stjóra gert að birta umbeðin gögn.

Frétt af mbl.is

Keypti smellubindi fyrir rúmar 300 þúsund krónur

Hjálmar sem FBI notar

Hjálmarnir voru keyptir af breska fyrirtækinu TST Protection.

Ríkislögreglustjóri keypti 55 stykki af Busch AMP-1 TP hjálmum þann 12. janúar 2023 ásamt aukabúnaði á borð við andlitshlífar og poka. Kostaði það 107.635 pund, eða 18.696.200 krónur.

Þessi tegund er til dæmis notuð af alríkislögreglunni í Bandaríkjunum (FBI). 

Busch AMp-1 tp hjálmur. Ljósmynd/TST Protection

Ríkislögreglustjóri pantaði svo fleiri hjálma af TST þann 31. janúar. Þá voru pantaðir 120 hjálmar af gerðinni Busch AMP-1 E ásamt aukabúnaði tengdum hjálmunum. Kostaði það 87.840 pund, eða 15.268.349 krónur.

Eiga hjálmarnir að vera skotheldir gegn 9 mm byssukúlum og 44 Magnum. 

Busch AMp-1 e hjálmur. Ljósmynd/TST Protection

Hjálmar og föt kostuðu rúmlega 46 milljónir

Inn á vefsíðu TST má sjá myndskeið og auglýsingar um hjálmana og hvernig þeir geta nýst lögreglu og sérsveit á vettvangi. Þá er sýnt hvernig fyrrnefndar tegundir verjast gegn byssukúlum. 

mbl.is greindi einnig frá kaupum ríkislögreglustjóra á fatnaði sem nam 12.366.643 krón­um. Þar á meðal voru keypt 146 smellubindi sem kostuðu um 313 þúsund krónur.

Kostnaður við kaup á hjálmum, búnaði þeim tengdum, og fatnaði nam alls 46.331.192 krónur.