Frétta- og umræðuþátturinn Spursmál fer í loftið á nýjan leik föstudaginn 16. ágúst næstkomandi. Útsendingin hefst kl. 14.00 á mbl.is, líkt og verið hefur og verður þátturinn í kjölfarið aðgengilegur á öllum helstu hlaðvarpsveitum auk YouTube.

Verður þátturinn á dagskrá á föstudögum í allan vetur.

Frá því að þættirnir hófu göngu sína hafa um 100 viðmælendur mætt á vettvang og rætt fréttir og fréttamál líðandi stundar. mbl.is/Eggert Jóhannesson

Spursmál hófu göngu sína 1. desember í fyrra og eru þættirnir nú orðnir 30 talsins. Umfjöllunarefni þáttarins eru af ýmsum toga en fastur liður er að valinkunnir gestir fara yfir helstu fréttir vikunnar, bæði hér heima og erlendis. Þá er í seinni hluta þáttarins fjallað um og rætt við fólk um álitamál sem ofarlega eru á baugi hverju sinni.

Stjórnandi þáttarins er Stefán Einar Stefánsson en viðtöl hans við frambjóðendur til embættis forseta Íslands vöktu verðskuldaða athygli síðastliðið vor.