Vilhjálmur Bretaprins vakti mikla athygli á dögunum fyrir skeggvöxt sinn og hafa breskir fjölmiðlar tekið vel í þá ákvörðun hans að láta sér vaxa skegg.

Vilhjálmur ákvað að láta reyna á nýtt útlit sitt í sumarfríinu sem hlýtur að teljast góð leið til þess að kanna viðtökurnar. Líki almenningi ekki við nýja útlitið þá getur hann alltaf sagt að hann hafi verið í sumarfríi og ekki nennt að raka sig. Fólk virðist þó almennt líka vel við nýja útlitið svo það er aldrei að vita nema hann leyfi því að vera.

Vitað er að það hefur lengi blundað í Vilhjálmi löngun til þess að vera með skegg líkt og bróðir sinn Harry prins en amma hans, Elísabet II. Bretlandsdrottning, ráðlagði honum frá því og þar við sat. Nú eru greinilega breyttir tímar og Vilhjálmur hefur loks fundið kjarkinn til þess að vera með skegg. 

Sérfræðingar í samskiptum kynjanna segja að skegg á körlum sé almennt álitið kynþokkafullt og að það sé ekkert nýtt í þeim efnum. „Þróunarfræðingurinn Darwin sagði að konum þætti skegg alltaf kynþokkafullt og þess vegna valdist það áfram í forfeðrum okkar,“ segir Dr. Tara í viðtali við Hello Canada.

„Skegg fær menn til þess að vera karlmannlegri og það höfðar til frumhvata okkar. Þá getur skegg gefið til kynna hærra testosterón magn sem einnig þykir karlmannlegt og aðlaðandi.“

Hvað útlitið varðar getur skegg skerpt kjálkalínu þeirra sem hafa ekki sterkbyggðan og afgerandi kjálka. Þá felur skegg líka undirhöku.

Dr. Tara bendir á rannsóknir frá árinu 2015 sem sýna að skegg eins og Vilhjálms þykja kynþokkafyllst. Þá á hún við skegg sem hylja allt andlitið. 

Þá hafa fjölmiðlar bent á að skeggvöxtur Vilhjálms geti verið tákn um löngun hans til þess að þykja aðlaðandi en líka sem tákn um andóf. Í ævisögu Harrys, Spare, kemur fram að Vilhjálmur hafi þurft að raka af sér skeggið vegna stöðu sinnar innan konungsfjölskyldunnar.

Harry mátti vera með skegg en ekki Vilhjálmur. AFP