Leikkonan Kaley Cuoco er trúlofuð kærasta sínum til tveggja ára, leikaranum Tom Pelphrey.

Cuoco, best þekkt fyrir leik sinn í bandarísku gamanþáttaröðinni The Big Bang Theory, greindi frá trúlofuninni á Instagram Story á miðvikudag. Leikaraparið á eina dóttur, Mathildu, sem kom í heiminn þann 30. mars á síðasta ári.

Frétt af mbl.is

Íslandsvinkona á von á barni

Þetta er í fjórða sinn sem Cuoco trúlofar sig en hún hefur tvívegis gengið í hjónaband. Hún var gift tennisleikaranum Ryan Sweeting á árunum 2013 til 2016 og gekk að eiga hestamanninn Karl Cook tveimur árum síðar. Þau skildu árið 2022, aðeins örfáum mánuðum áður en Cuoco byrjaði með Pelphrey.

Cuoco sagði í viðtali við tískutímaritið Glamour árið 2022 að hún myndi aldrei ganga í hjónaband aftur en greinilegt er að henni hafi snúist hugur.