Í byrjun sumars var afar fallegt 196,1 fm einbýli í Fossvogi auglýst til sölu. Um er að ræða einbýlishús sem er við Bjarmaland í Fossvogi. Húsið var reist 1969 þegar flöt þök og stórir gluggar þóttu hvað mest móðins. 

Húsið stendur á jaðarlóð og er alveg í hjarta Fossvogsdalsins þar sem veðursæld er ríkuleg. Fasteignamat hússins er 189.600.000 kr. og var verðmiðinn á sama stað. Þótt skipulag hússins væri gott þá þarfnaðist það viðhalds og endurbóta. 

Nú hefur húsið verið selt á 183.400.000 kr. Kaupandi hússins er Landsar ehf. sem er í eigu Ragnars Þórs Hannessonar. Hann er pípulagningameistari og rekur fyrirtækið Landslagnir pípulagnir. 

Smartland óskar félaginu til hamingju með húsið! 

Húsið stendur á jaðarlóð við útivistarsvæði í Fossvogi.