Við Sunnuveg í Reykjavík er að finna 267 fm einbýlishús sem reist var 1961. Húsið var teiknað af Gísla Halldórssyni og hefur fengið gott viðhald í gegnum tíðina. Eigendur hússins eru Jensína Kristín Böðvarsdóttir eigandi og framkvæmdastjóri Vinnvinn og Þorvaldur Jacobsen framkvæmdastjóri Landsnets. 

Húsið er eitt af þessum eftirsóttu húsum við Sunnuveg en gatan býr yfir töluverðri sérstöðu því húsin eru bara byggð öðrum megin götunnar og státa húsin yfir útsýni yfir eitt besta útivistarsvæði borgarinnar, Laugardalinn sjálfan. 

Eldhúsið var endurnýjað 2015 og hefur það að geyma sérsmíðaðar innréttingar sem koma frá Hegg. Þar mætast gráar og hvítar sprautulakkaðar skápahurðir og einfaldleikinn í forgrunni. Eldhúsið er opið inn í stofu og borðstofu. 

Hönnunin á húsinu er einstaklega smekkleg og eru stórar rúður einkennandi fyrir byggingarstílinn. Í kringum húsið er myndarlegur garður með öllu því helsta eins og heitum potti, stórum palli, vel hirtum trjám og matjurtakössum sem hægt er að rækta sitt eigið grænmeti. 

Einhver myndi segja að þetta hús hefði allt til að bera ef fólk vill lifa hinu ljúfa lífi. 

Sjá nánar á fasteignavef mbl.is: Sunnuvegur 13

Eldhúsið var endurnýjað 2015.

Húsið er glæsilegt með myndarlegum og grónum garði sem vel hefur verið hugsað um.