Myndskeið af tveimur íslenskum stúlkum að dansa með eldgosið í baksýn hefur vakið mikla athygli á samfélagsmiðlasíðunni TikTok síðustu klukkustundir. Sú sem deildi myndskeiðinu heitir Sóley Halldórsdóttir, 18 ára gömul Keflavíkurmær. 

Blaðamaður mbl.is hafði samband við Sóleyju og fékk að heyra söguna á bak við, það sem má kalla, „heitasta“ dansinn á TikTok.

„Við vorum með nýnemahitting í skólanum þegar við fengum SMS-skilaboð um að það væri byrjað að gjósa, enn eina ferðina. Við tókum öll rúntinn að gosinu og fylgdumst með í dágóða stund.

Þegar við vorum að fara þá stakk vinkona mín og dansfélagi í myndbandinu, Bríet Björk Hauksdóttir, upp á því að búa til TikTok-myndband. Þannig gerðist það,“ útskýrir Sóley sem segir viðbrögðin hafa verið hreint úr sagt ótrúleg.

Tókst dansinn í fyrstu tilraun?

„Já, við negldum þetta strax. Þetta er einhver „viral“ dans sem heitir að ég held Apple-dansinn, hann er dansaður við lagið Apple eftir bresku tónlistarkonuna Charli XCX,“ útskýrir Sóley.

Frétt af mbl.is

Bein útsending: Eldgos á Reykjanesskaga