Gosmóða vegna eldgossins við Sundhnúkagíga mælist nú víða um suðvesturhornið. 

„Það er einhver gosmóða á höfuðborgarsvæðinu en hún mælist hæst í Vogunum og fyrir austan fjall. Í Hveragerði og á Selfossi er hún komin upp í appelsínugult gildi hjá loftgæðamæli Umhverfisstofnunnar,“ segir Ingibjörg Andrea Bergþórsdóttir, náttúruvársérfræðingur á Veðurstofu Íslands, í samtali við mbl.is.

Frétt af mbl.is

Virðist hafa dregið úr virkni eldgossins

Hún varar við því að mjög viðkvæmir geti fundið fyrir einkennum og ráðleggur þeim að loka gluggum og forðast áreynslu utandyra.

Búast má við gosmóðu á suðvesturhorni landsins í dag. Kort/Veðurstofa Íslands

Ungabörn sofi ekki utandyra 

Ekki er mælt með því að ungabörn sofi úti í vögnum í Vogunum eða á Hveragerði og Selfossi í dag.

Gera má ráð fyrir gosmóðu næstu daga eða þar til það fari að hvessa meira eða rigna sem gerist um helgina.

Hægt er að fylgjast með gasmengun í rauntíma á vefnum loftgaedi.is.

Appelsínugular merkingar eru á sumum mælistöðvum. Kort/Umhverfisstofnun