Horft er til þess að salan á helmingi hlutabréfa af þeim 43% sem ríkið á í Íslandsbanka fari fram fyrir árslok og að síðari hlutinn verði seldur á því næsta. Búið er að ganga frá samningum við flesta umsjónaraðila með sölunni sem ríkið þarf á að halda í ferlinu og málið komið á gott skrið. Þetta segir Sigurður Ingi Jóhannsson, fjármála- og efnahagsráðherra.

Fyrir þinglok í vor samþykkti Alþingi lög um ráðstöfun á eignarhlutnum í Íslandsbanka, en það fól í sér að hlutur ríkisins yrði seldur í markaðssettu útboði eða útboðum.

„Það er enn miðað að því að selja helminginn á þessu ári, ef markaðsaðstæður leyfa og undirbúningur er kominn nægjanlega langt,“ segir Sigurður Ingi og á þar við helminginn af 43% hlut ríkisins sem ríkið heldur enn á. Hann segir ferlið komið vel af stað. „Þetta er komið á góðan damp.“

Spurður nánar um þessa tímasetningu segir hann að það yrði þó aldrei fyrr en seint í haust eða inn í veturinn. Ítrekar hann þó að það fari allt eftir markaðsaðstæðum og hvernig undirbúningur gengur. Þá sé horft til þess að síðari skammturinn verði seldur á næsta ári.

Rifjar Sigurður Ingi upp að í síðasta mánuði hafi verið samið við fjármálafyrirtækin Barclays, Citi og Kviku um að vera umsjónaraðilar í fyrirhuguðu útboði ríkisins. Hann segir það skipta gríðarlega miklu máli að hafa fengið þessi fjármálafyrirtæki til að halda utan um útboðið, en Barclays og Citi eru meðal stærstu fjárfestingabanka heims.