Nýr bar, Daisy, opnaði nýlega í miðbæ Reykjavíkur í fyrrum húsakynnum Spánska barsins á Ingólfsstræti 8. Þetta er þriðji staðurinn sem „Jungle strákarnir“ opna en ásamt hinum víðþekkta Jungle Cocktail Bar reka þeir einnig Bingó Drinkery á Skólavörðustíg.

Á Daisy má finna klassíska kokteila auk kokteila sem eru minna þekktir hér á landi en eiga sér engu að síður langa sögu á börum erlendis.

Þekktir og klassískir kokteilar

„Hugmyndin með þessum bar er að bjóða upp á huggulega stemningu ásamt því að kynna fólki fyrir minna þekktum en samt frábærum klassískum kokteilum. Þetta eru kokteilar sem barþjónar hafa verið að gera í hátt í hundrað ár eða jafnvel lengur á börum í New York og London svo fátt sé nefnt en hafa ekki ennþá fest rætur sínar á hér Íslandi,” Jakob Eggertsson, einn af eigendum Daisy.

Fjóreykið bregður á leik. Ljósmynd/Aðsend

Jakob er einn af bestu barþjónum landsins og lenti í 10. sæti stóru World Class keppninni þar sem bestu barþjónar heims mættust og töfruðu fram kokteila hver með sínu nefni.

Frétt af mbl.is

Jakob kominn í úrslit í Sao Paulo

„Þetta er náttúrulega huggulegt rými sem fangar augun, hálf niðurgrafið með opnum steinveggjum og múrsteinssúlum Við breyttum ekki miklu varðandi uppsetningu á staðnum en við erum búnir að skreyta hann á öðruvísi hátt, aðeins til að setja okkar fingraför á hann,“ segir Jakob enn fremur.

Bjóða upp á skemmtilega og þægilega stemningu

„Á öllum þessum stöðum snýst leikurinn náttúrulega um bjóða upp á skemmtilega og þægilega stemningu. Við erum samt með mismunandi fókus punkt á öllum þessum stöðum. Til að mynda er Jungle staðurinn til að smakka nýjar og framandi kokteilhugmyndir sem barþjónarnir þar eru stanslaust að galdra fram. Á Bingó berum við einnig fram skemmtilega kokteila ásamt því að einblína mikið á íslenskan handverksbjór. Síðan hér á Daisy verða ekta klassískir kokteilar verða bornir fram og við munum einnig vera með 8 tegundir af léttvín í glösum og létt snarl.”

Austurvallarswizzle kokteillinn. Ljósmynd/Aðsend

Þessi kokteill ber enska heitið „Remember the Maine“. Ljósmynd/Aðsend

Opið er á Daisy alla daga frá klukkan 16:00-01:00 með hamingjustund frá klukkan 16:00-18:00. Fyrir áhugasama er hægt að fylgjast með strákunum á Daisy hér.