Við fornleifauppgröft í Seyðisfirði, við bæinn Fjörð hefur komið í ljós að stunduð var umfangsmikil framleiðsla á vaðmáli. Sérstakt rými hefur verið grafið upp sem virðist hafa verið eingöngu nýtt til að spinna og vefa.

Ragnheiður Traustadóttir, sem stjórnaði uppgreftrinum og heldur utan um rannsóknir á þeim munum sem fundust, var gestur Dagmála í vikunni.

Hún segir að ekki hafi verið staðfest með óyggjandi hætti að segl fyrir víkingaskip hafi verið framleidd hér en telja verði það mjög líklegt. Landnáma greinir frá fjögur hundruð landnámsmönnum sem settust hér að.

Segl skipanna voru stór og afskaplega verðmæt. Ragnheiður segir að þurft hafi ull af 250 kindum til að spinna og vefa segl fyrir átján metra skip á þeim tíma og það hafi ekki verið stærstu skipin. Fyrir eina konu hafi tekið þrjú ár að fullbúa eitt slíkt segl.

Segl fyrir víkingaskip

Það mikla magn af gripum sem tengjast spuna og vefnaði sem fundist hafa í Firði leiðir líkur að því að þar hafi verið spunnin og ofin segl fyrir víkingaskip. Svo mikil virðist framleiðslan hafa verið að hún var langt frá því að flokkast sem sjálfsþurftabúskapur.

Í viðtalsbrotinu sem fylgir fréttinni ræðir Ragnheiður um segl og gerð þeirra á víkingaöld. Þátturinn í heild sinni er aðgengilegur fyrir áskrifendur Morgunblaðsins.

Áskrifendur geta horft á þáttinn í heild sinni:

Fornleifar í Firði vekja heimsathygli

Ragnheiður segir að þurft hafi ull af 250 kindum til að spinna og vefa segl fyrir átján metra skip á þeim tíma og það hafi ekki verið stærstu skipin. mbl.is/Eggert Jóhannesson