Íris Ósk Valþórsdóttir, rekstrarstjóri Vaxa, hefur sett glæsihýsi sitt á sölu. Um er að ræða 205 fm einbýlishús sem reist var 1991. Húsið var teiknað af Baldri Svavarssyni arkitekt. Húsið hefur verið mikið endurnýjað á síðustu árum. Viktoría Hrund Kjartansdóttir innanhússhönnuður hannaði breytingar innanhúss. Búið er að skipta um lýsingu í húsinu og endurnýja innréttingar svo eitthvað sé upptalið. Gólfhiti var settur í húsið og skipt um gólfefni að hluta til. 

Nýtt eldhús! 

Viktoría Hrund hannaði nýtt eldhús í húsinu. Hurðar á innréttingu eru úr bæsaðri eik og er Taj Mahal kvarrtsít á borðplötum og flæðir efnið upp á veggi á milli skápa. Í eldhúsinu er stór eyja og mikið pláss til athafna. Tveir innbyggðir ísskápar eru í innréttingunni. 

Sjónsteypa setur svip

Húsið er á tveimur hæðum og setur stór og myndarlegur veggur úr sjónsteypu svip sinn á innra rými hússins. Mjög hátt er til lofts í stofunni og hringlaga gluggi gefur heimilinu sérstakt yfirbragð. 

Eins og sjá má á myndunum er heimilið búið heillandi húsgögnum, listaverkum og lömpum, ljósum og öðru sem fegrar og hlýjar. 

Sjá nánar á fasteignavef mbl.is: Birkihæð 14