Broadway-leikarinn Gavin Creel er látinn 48 ára að aldri. Hann lést á heimili sínu í New York eftir snarpa baráttu við mjög sjaldgæft krabbamein.

Kynningarfulltrúi leikarans staðfesti andlátið í samtali við The Associated Press.

Creel átti afar farsælan feril sem sviðsleikari og lék í sýningum á borð við Hello, Dolly!, Hair, Thoroughly Modern Millie og The Book of Mormon. Hann hreppti Tony-verðlaun fyrir hlutverk sitt í söngleiknum Hello, Dolly!, en þar lék hann á móti Bette Midler.

Fjölmargir hafa minnst leikarans á samfélagsmiðlum síðastliðinn sólarhring. Meðal þeirra eru Neil Patrick Harris, Bette Midler, Idina Menzel, Uzo Aduba, Josh Gad og Andrew Rannells.