Landspítalinn hefur fengið til sín lítinn, loðinn og einstaklega krúttlegan, liðsauka.

Kjarkur, sem er golden retriever-hvolpur, var kynntur til leiks á Instagram-síðu Landspítalans nú á dögunum og hefur ráðningin vakið mikla athygli, en hátt í 4.000 manns hafa líkað við færsluna. Fjölmargir hafa einnig óskað Kjarki til hamingju með nýja starfið.

„Kjarkur er nýkominn til starfa á Landspítala. Hann er enn í aðlögun sem iðjuhundur á Kleppi og 32A á Hringbraut og mun koma til með að taka þátt í hundaknúsi og deildargöngum þegar hann verður stór ásamt því að vera stuðningur við skjólstæðinga og starfsfólk,” stendur við færsluna.

Golden retriver-hundar eru þekktir fyrir vinnusemi, glaðlegt viðmót og elskulegheit. Kjarkur á því án efa eftir að sinna starfi sínu með miklum sóma.