Mark Rutte, nýr framkvæmdastjóri NATO, segist ekki hafa áhyggjur af áhrifum mögulegs sigurs Donalds Trumps í komandi forsetakosningum í Bandaríkjunum á bandalagið. Hann heitir því jafnframt að halda áfram stuðningi NATO við Úkraínu.

Frétt af mbl.is

Mark Rutte tekur við af Stoltenberg

Rutte, sem er fyrrverandi forsætisráðherra Hollands, tók í morgun við embætti framkvæmdastjóra Atlantshafsbandalagsins af Norðmanninum Jens Stoltenberg.

Búist er við því að fyrsta stóra prófraun Rutte í embætti verði samskipti við næsta forseta Bandaríkjanna en kosningarnar þar fara fram 5. nóvember.

Rutte og Stoltenberg í morgun. AFP/John Thys

Trump, frambjóðandi Repúblikanaflokksins, hefur á kosningafundum heitið því að vernda ekki aðildarríki NATO sem eyða ekki nægum fjármunum í varnarmál. Einnig hefur hann lofað því að ná skjótum samningi við Vladimír Pútín Rússlandsforseta um að binda enda á stríðið í Úkraínu.

Frétt af mbl.is

Stoltenberg bregst við ummælum Trumps um NATO

„Ég hef engar áhyggjur. Ég þekki báða frambjóðendurna mjög vel. Ég starfaði í fjögur ár með Donald Trump. Hann vildi að við eyddum meiri peningum og honum varð að ósk sinni,“ sagði Rutte áður en hann tók formlega við embættinu.

Donald Trump. AFP/Chandan Khanna

„Ég mun geta starfað með þeim báðum sama hver útkoman verður í kosningunum,“ bætti hann við, en Kamala Harris býður sig fram til forseta fyrir hönd Demókrataflokksins.

Stoltenberg hafði þetta að segja um eftirmann sinn: „NATO verður í öruggum höndum með þig við stjórnvölinn.“