Settur verjandi fyrrverandi eiginkonu Páls Steingrímssonar talar ekki í umboði hennar þegar hann segir lögregluna á Norðurlandi eystra fara með ósannindi í færslu sem embættið birti á Facebook-síðu sinni 26. september. Þetta staðfestir hann í samtali við mbl.is, en hann segist ekki vera starfandi lögmaður konunnar.

Hólmgeir Elías Flosason, settur verjandi konunnar, segir í samtali við mbl.is að hann kalli eftir opinberri rannsókn á framferði lögreglunnar og sjái fyrir sér að eftirlitsaðili taki málið að eigin frumkvæði til skoðunar.

Hólmgeir kallaði eftir opinberri rannsókn á vinnubrögðum lögreglunnar í viðtali við Heimildina í gær. Hann sagði lögregluembættið fara með fleipur í viðtalinu og að hann hafi upplýsingar undir höndum sem dragi fram að lögreglan segi hreinlega ósatt.

Frétt af mbl.is

Rannsókn í byrlunar- og símamáli felld niður

Kallar eftir opinberri rannsókn

Hólmgeir kveðst ekki ætla sjálfur að leggja fram kæru til að hleypa af stað rannsókn á vinnuháttum lögreglunnar á Norðurlandi eystra en að hann kalli eftir opinberri rannsókn og að hægt verði að leita til hans sé óskað eftir gögnum og upplýsingum.

„Ég sé bara fyrir mér að einhver eftirlitsaðili taki þetta á eigin frumkvæði til skoðunar.“

Jakob R. Möller hæstaréttarlögmaður gagnrýndi rannsókn málsins í viðtali við Morgunblaðið í síðustu viku. Hann taldi rannsóknina frá upphafi hafa verið hrákasmíð og eðlilegast væri að fara fram á rannsókn á starfsháttum lögreglunnar á Norðurlandi eystra.

Frétt af mbl.is

Vissi ekkert hvað hún var að gera

Settur verjandi

Fréttir af viðtali Hólmgeirs kynna hann sem lögmann fyrrverandi eiginkonu Páls. Hann er settur verjandi hennar og hefur ekki fengið fregnir af því að annar hafi tekið við málinu, en segist ekki hafa verið í sambandi við hana síðan í vor.

Ertu starfandi lögmaður konunnar?

„Nei,“ segir hann og heldur áfram: „Ég er búinn að vera verjandi hennar í þremur málum og mér hefur ekki verið tilkynnt að það sé annar verjandi kominn í málið.“

Hann segist hafa verið verjandi hennar í tveimur ákærum og sé tilnefndur verjandi í byrlunar- og símastuldursmálinu.

Hólmgeir var verjandi fyrrverandi eiginkonu Páls í tveimur ákærum og er tilnefndur verjandi í stærra byrlunar- og símastuldursmálinu. mbl.is/Sigurður Bogi

Meðal þeirra mála sem hann stóð sem verjandi hennar í, var ákæra á hendur hennar fyrir umsáturseinelti gegn Örnu McClure, fyrrverandi lögmanni Samherja. Hún var sýknuð í því máli.

Hólmgeir telur litlar líkur á því að hefði byrlunar- og símastuldursmálið farið fyrir dóm að hann hefði verið verjandi konunnar: „Ef þetta mál hefði farið fyrir dóm hefði ég að öllum líkindum ekki varið það.“

Frétt af mbl.is

Segir lögreglu sá efasemdum um heilindi

Talar ekki í umboði konunnar

Spurður hvort hann tali í umboði fyrrverandi eiginkonu Páls segir Hólmgeir svo ekki vera. 

„Ég er ekki endilega að tala í hennar umboði, ég er að útskýra mína aðkomu og hvernig þetta horfir við mér sem lögmanni og þátttakanda í þessu máli.“

Páll greindi frá því í færslu á Facebook-síðu sinni að síðasta orðið hafi ekki verið sagt í málinu og að hann muni halda áfram að leita réttlætis.

Frétt af mbl.is

„Síðasta orðið hefur ekki verið sagt“