Fyrirtækið Norðanfiskur bauð til mikillar matarveislu í nýuppgerðu sýningareldhúsi fyrirtækisins á miðvikudag. Haldin var glæsileg matar- og vínkynning fyrir helstu aðila innan veitingageirans.

Meðal gesta voru Sigmar Vilhjálmsson framkvæmdastjóri Eldum Gott, Snorri Grétar Sigfússon, eigandi og yfirkokkur Monkeys Reykjavík, Jón Arnar Guðbrandsson, veitingamaður og eigandi Grazie Trattoria og Mýrin Brasserie og Mónika Sif Gunnarsdóttir yfirkokkur á Apótekinu.

Nick Walters, margverðlaunaður kanadískur kokkur, töfraði fram gómsætar kræsingar og bauð gestum upp á snjókrabba, humar og hörpuskel frá heimalandi sínu, Kanada, og ferskan lax úr landeldi. Að auki var vínkynning frá Lífsins vatn ehf. Fyrirtækið flytur inn hágæða léttvín frá Ítalíu.