Benjamín Netanjahú, forsætisráðherra Ísraels, segir Emmanuel Macron Frakklandsforseta og öðrum leiðtogum vestrænna ríkja að skammast sín fyrir að kalla eftir því að banna skyldi sölu vopna til Ísraels.

Macron hvatti í dag til þess að vopnaflutningar til Ísraels yrðu stöðvaðir.

„Ég held að í dag sé forgangsatriðið að við snúum aftur til pólitískrar lausnar, að við hættum að afhenda vopn til notkunar í stríðinu á Gasa,“ sagði Macron.

Frétt af mbl.is

Einn af yfirmönnum Hamas drepinn

Siðmenntuð ríki ættu að standa með Ísrael

„Á sama tíma og Ísraelar berjast gegn villimannaöflum undir forystu Írans, ættu öll siðmenntuð ríki að standa þétt við hlið Ísraels. Samt ætlar Macron forseti og aðrir leiðtogar Vesturveldanna nú að kalla eftir vopnasölubanni til Ísraels. Þeir ættu að skammast sín,“ sagði Netanjahú í yfirlýsingu seinna í dag.

„Er Íran að setja vopnasölubann á Hisbollah, Húta, Hamas og aðra bandamenn þeirra? Auðvitað ekki.“

Frétt af mbl.is

Á annað þúsund manns hafa fallið í Líbanon

Vinni stríðið án stuðnings

Hóparnir þrír njóta stuðnings frá stjórnvöldum í Íran og eru hluti af andspyrnu þeirra gegn Ísrael.

„Hryðjuverkaöxulveldin standa saman en ríki sem eiga að vera andvíg þessum hryðjuverkahópum kalla eftir vopnasölubanni á Ísrael. Þvílík skömm!“ sagði Netanjahú.

Sagði hann að Ísraelar myndu vinna stríðið þrátt fyrir að njóta ekki stuðnings Vesturveldanna.