Karlmaður hefur verið ákærður af embætti héraðssaksóknara fyrir að brotið kynferðislega á barnungri náfrænku sinni ítrekað á árunum 2014 til 2017.

Er hann sakaður um nauðgun með því að hafa haft samræði við hana og önnur kynferðismök í fjölda skipta á heimili hennar, heimili hans og í bifreið á óþekktum stað í fjölda skipta.

Maðurinn er einnig ákærður sérstaklega fyrir að hafa áreitt stúlkuna kynferðislega í allavega tvö skipti.

Þá er hann ákærður fyrir að hafa framleitt myndefni sem sýnir barn á kynferðislegan og klámfengin hátt.

Mikið magn af myndefni, skammbyssa og gasbyssa

Maðurinn er einnig sakaður um að hafa framleitt barnaníðsefni með því að hafa falsað myndefni af stúlku þannig að hún virðist nakin þó hún hafi verið klædd í fatnað á upprunalegum myndum.

Í ákærunni sem mbl.is hefur undir höndum er búið að taka út hvort um sömu stúlku sé að ræða þegar kemur að seinni liðum ákærunnar og þeim fyrsta, en það verður þó að teljast líklegt þar sem aðeins er gerð ein einkaréttarkrafa um miskabætur í málinu.

Maðurinn er jafnframt sakaður um að hafa haft í vörslum sínum mikið magn af myndefni sem sýni kynferðislega misnotkun á börnum. Er talið upp að hann hafi meðal annars verið með 840 slíkar ljósmyndir og sjö myndskeið. Þá hafi hann opnað að minnsta kosti 60 mismunandi grunnnetsíður sem höfðu að geyma slíkt efni og 4.577 undirsíður á slíkum vefsíðum.

Að lokum er hann ákærður fyrir vopnalagabrot með því að hafa haft í vörslum sínum skammbyssu og gasbyssu sem lögregla fann við húsleit.

Fyrir hönd stúlkunnar er farið fram á að maðurinn greiði henni 4 milljónir í miskabætur.