Ferðalög bjóða upp á alls kyns upplifun, þau eru skemmtileg, fræðandi og róandi. Gætu jafnvel verið lífsbreytandi. En ýmislegt ber að varast samkvæmt Travel and Leisure, sérstaklega þegar innritað er inn á nýtt hótel. Ákveðin vitneskja um óhreinindi á hótelherbergjum gæti fengið gesti til að vera með sprittbrúsann á lofti. 

Brian Labus, lektor í faralds- og líffræði við háskólann í Nevada í Las Vegas, segir ísföturnar vera aðal vandamálið þegar kemur að útbreiðslu sýkinga.

Best að fóðra föturnar að innan

Hann mælir eindregið með að fóðra föturnar að innan áður en þær eru notaðar. Hann nefnir nóróveiru-hópsýkingu sem þeir rannsökuðu fyrir nokkrum árum. Fólk sem kastaði upp hafi gripið í það sem var hendi næst; ísfötuna.

Þegar baðherbergin voru sótthreinsuð fyrir næstu gesti, hafi ísföturnar aðeins verið skolaðar. Næstu gestir hafi því fengið óvænta viðbót með klökunum í ísfötunni. 

Þá segir hann að ekki nokkur leið sé að verjast smiti sem þessu á hótelherbergjum, nema gestir taki upp á að þrífa herbergin sjálfir fyrir notkun.

Hann mælir jafnframt með að gestir hagi sér eins og sóttvarnalæknar við komuna á nýtt hótelherbergi.

Travel and Leisure.