„Það væri nú eitthvað ef við fengjum kosningagos en það er alveg möguleiki,“ segir Benedikt Gunnar Ófeigsson, fagstjóri aflögunarmælinga á Veðurstofu Íslands, spurður út í stöðu mála á Sundhnúkagígaröðinni.

Benedikt hefur sagt að mögulega geti farið að draga til tíðinda á Reykjanesinu á nýjan leik um miðjan nóvember en þingkosningar eiga að fara fram laugardaginn 30. nóvember.

Frétt af mbl.is

Verðum að vera viðbúin stærra eldgosi

Hægt á landrisi og dregið úr kvikuinnflæði

„Við sjáum alveg að skýrt landris heldur áfram í Svartsengi þó svo að vísbendingar séu um að það hafi hægt örlítið á hraða þess og dregið úr kvikuinnflæði.“

Nákvæmlega hvað þetta þýðir segir Benedikt erfitt að segja til um og of snemmt sé að túlka hvað þetta geti þýtt upp á framhaldið.

Benedikt Gunnar Ófeigsson, fagstjóri aflögunarmælinga á Veðurstofunni. mbl.is/Eyþór Árnason

Síðasta eldgosi lauk 5. september og stóð það yfir í tvær vikur. Það var það þriðja lengsta af þeim gosum sem hafa orðið á Sundhnúkagígaröðinni frá því í desember 2023 en var um leið það kraftmesta.

Benedikt sagði í samtali við mbl.is upp úr miðjum september að við gætum verið róleg alveg fram í miðjan nóvember. Núna segist hann meta stöðuna á svipaðan hátt.

Frétt af mbl.is

Gæti orðið erfitt að spá fyrir um næstu gos

„Það er ólíklegt að það gerist eitthvað mikið fyrr en um miðjan nóvember. Væntanlega förum við að koma út með fréttatilkynningar í byrjun nóvember um að kerfið sé farið að nálgast þau rúmmálsmörk sem það náði fyrir síðasta gos og munum þá benda á að það fari að styttast í einhverja atburðarás,“ segir Benedikt.

Tíminn að lengjast á milli gosa

Benedikt segir að það þurfi alveg að gera ráð fyrir því að bíða lengi, jafnvel fram í desember eða fram á næsta ár að eitthvað gerist. Hann segir þróunina hafa verið þannig að tíminn sé alltaf að lengjast á milli gosa.

„Það virðist erfiðara og erfiðara fyrir kvikuna að komast upp á yfirborðið og vonandi er það vísbending um að það fari að styttast eitthvað í annan endann á þessu. Við þurfum að búa okkur undir það að vera tilbúin um miðjan nóvember en það getur samt þýtt að við þurfum að bíða í tvo mánuði,“ segir Benedikt.

Hættumat Veðurstofunnar fyrir svæðið gildir til morgundagsins og segir Benedikt að nýtt hættumat verði gefið út á morgun.

„Það verður metið á fundi á morgun hvort það verði óbreytt eða hvort við förum að gíra okkur aðeins upp en það verða engar stórkostlegar breytingar á því.“

Frétt af mbl.is

Líkur á dyngjugosi þykja fara vaxandi

Þorvaldur Þórðarson eldfjallafræðiprófessor sagði í samtali við Morgunblaðið ekki alls fyrir löngu að líkurnar á því að dyngjugos verði á Sundhnúkagígaröðinni aukist með tímanum.

„Ég held að það sé afskaplega ólíklegt. Flestallar dyngjurnar mynduðust í kjölfar þess að ísaldarjökullinn hopaði og þegar hann var að þynnast komu stóru dyngjugosin. Við höfum ekki séð nein dyngjugos á Reykjanesinu árþúsundum saman og ég held að það séu engar vísbendingar um að það sé svo mikil kvika í boði að geta viðhaldið stóru dyngjugosi,“ segir Benedikt.