Bandaríski tónlistarmaðurinn Jake E. Lee, best þekktur sem gítarleikari Ozzy Osbourne sem og rokksveitarinnar Red Dragon Cartel, var skotinn margsinnis er hann var á göngu með hundinn sinn í borginni Las Vegas aðfaranótt þriðjudags.

Ekki er vitað um ástæðuna að baki árásinni en að sögn lögreglu þá slapp gítarleikarinn, sem er 67 ára, nokkuð vel. Talið er að hann muni ná sér að fullu.

Enn er enginn grunaður um verknaðinn en málið er í rannsókn og er meðal annars verið að skoða gögn úr eftirlitsmyndavélum á svæðinu.

Umboðsmaður tónlistarmannsins ræddi við The Associated Press í kjölfar árásarinnar og sagði það afar heppilegt að byssukúlurnar hefðu ekki hæft mikilvæg lífffæri.