Uppskriftir | 19. október 2024

Sælkerabollur Sofiu slógu í gegn

Sigurður Már Guðjónsson bakarameistari og kökugerðarmaður á heiðurinn af helgarbakstrinum að þessu sinni. Sigurður á og rekur Bernhöftsbakarí sem staðsett er í hjarta miðborgarinnar við Klapparstíg 3. Hann er orðinn frægur fyrir að bjóða upp á rjómabollur til sölu allan ársins í hring um helgar og þær rjúka út líkt og heitar lummur.

Sælkerabollur Sofiu slógu í gegn

Uppskriftir | 19. október 2024

Sigurður Már Guðjónsson bakarameistari og kökugerðamaður býður upp á helgarbaksturinn að þessu sinni, sælkerabollur Sofiu. Samsett mynd

„Þær seljast ávallt upp og það er deginum ljósara að Íslendingar eru sólgnir í rjómabollur,“ segir Sigurður og hlær.

Frétt af mbl.is

„Allir vitlausir í rjómabollur“

Á dögunum gerði Sigurður nýja útgáfu af bollum með nýrri fyllingu og skreytti með vanillurjóma, jarðarberjum og myntulaufum með glæsilegri útkomu. Þær slógu í gegn og færri fengu en vildu. Hann ákvað að deila uppskriftinni með lesendum Matarvefsins.

„Innblásturinn fékk ég frá Sumarköku Sofiu sem ég gerði í sumar þar sem jarðarber, myntulauf og vanillurjóminn gera útslagið. Þessi uppskrift gefur um 20 stykki bollur. Meðfylgjandi er uppskrift af heimagerðum möndlumassa en það er líka hægt að kaupa tilbúinn Odense kransamassa í næstu matvöruverslun ef fólk vill spara sér tíma,“ segir Sigurður.

Frétt af mbl.is

Heiðrar minningu Sofiu með Sumarköku Sofiu

Ef ykkur langar að slá í gegn í næsta helgarkaffi eru þessar málið.

Girnilegar sælkerabollurnar hennar Sofiu og gullfallegar. mbl.is/Karítas

Sælkerabollur Sofiu

Vatnsdeigsbollur

20 stk.

380 g vatn
140 g smjör
10 g salt
280 g hveiti
10 stk. egg

Aðferð:

Hitið vatn að suðu ásamt smjörinu og saltinu.
Bætið síðan hveitinu út í á meðan hrært er stöðugt og ristið blönduna þar til hún losnar frá trésleifinni og botninum á pottinum.
Setjið strax í hrærivélapott og látið kólna niður þar til deigið orðið volgt.
Notið spaðann og blandið smám saman eggjunum saman við.
Magnið af eggjum sem þið bætið við fer eftir því hversu þykk blandan er.
Deigið á að vera aðeins seigt.
Ef eggja magnið er of hátt lekur þetta allt út við bakstur og hrynur saman.
Fyllið sprautupoka með stjörnustút (nr. 13) og sprautið deigið á plötu í rósettu.
Bakið í forhituðum ofni við 210°C hita þar til bollurnar hafa lyft sér og bakið vel (þurrt) til að koma í veg fyrir að þær falli saman.
Bökunartími er um það bil 25 mínútur, það fer reyndar eftir ofnum og getur vel verið allt að 35 mínútur fyrir stórar bollur.

Möndlumassi

200 g hýðislausar möndlur
100 g flórsykur
1 msk. eggjahvíta
1 tsk. vatn

Aðferð:

Hrærið möndlurnar í matvinnsluvél í grófan mola, ekki ofblanda.
Setjið í skál og bætið eggjahvítunni, vatni og flórsykri saman við.
Hrærið þar til það byrjar að blandast eins og deig.
Þrýstið í pylsuform, pakkið inn og setjið í ísskáp þar til nota á massann.

Fylling

200 g möndlumassi
100 -150 ml mjólk
1 msk. flórsykur

Aðferð:

Vigtið 200 g af möndlumassanum (afganginn til að nota í annan tíma).
Rífið möndlumassann í skál og bætið svo mjólkinni og saman við til að fá slétt deig með flórsykrinum.
Það ætti að vera gott og mjúkt til að sprauta, þið gætuð þurft að bæta við meiri mjólk en tilgreint er ef massinn er of stífur.

Vanillurjómi

1 l rjómi
2 stk. vanillustangir

Aðferð:

Stífþeytið rjómann með vanillufræjunum innan úr vanillustöngunum.

Samsetning:

Skerið bollurnar í tvennt, sprautið um 45 g af fyllingu á botninn og sprautið svo um 50 g vanillu rjóma ofan á.
Setjið lokið á og sigtið flórsykur yfir.
Í lokin er sprautuð rósetta í miðjuna og skreytt með jarðarberi og myntulaufum eftir smekk.