Fólksfjöldi í Úkraínu hefur dregist saman um rúmar tíu milljónir síðan Rússar réðust inn í landið í febrúar árið 2022. Síðan þá hefur mikill fólksflótti verið þaðan, auk þess sem fæðingartíðni hefur minnkað mikið, að sögn Sameinuðu þjóðanna.

Fólksfjöldastofnun Sameinuðu þjóðanna sagði að ekkert manntal hefði verið gert en að greinlega hefði fólksfjöldinn dregist verulega saman í hinni stríðshrjáðu Úkraínu.

Kona gengur fram hjá húsarústum í Pokrovsk í austurhluta Dónetsk-héraðs í Úkraínu í síðustu viku. AFP/Roman Pilipey

Áður en stríðið hófst var fæðingartíðnin í Úkraínu ein sú lægsta í Evrópu. Líkt og í mörgum ríkjum Austur-Evrópu hafði hún dregist saman vegna þess að ungt fólk yfirgaf landið í leit að betra lífi og auknum tækifærum, sagði Florence Bauer hjá stofnuninni.

En síðan stríðið hófst hafa um 6,7 milljónir manna flúið landið, auk þess sem fæðingartíðnin hefur farið niður í um eitt barn á hverja konu, sem er ein lægsta fæðingartíðnin í heiminum.

Miðað er við að fæðingartíðnin þurfi að vera 2,1 barn á hverja konu til að viðhalda fólksfjölda þjóða.