Sigurður Ingi Jóhannsson, fjármálaráðherra og innviðaráðaherra í starfstjórninni, segir tímaramman áskorun fyrir stjórnina að koma fjárlagafrumvarpinu í gegn fyrir þinglok en kosið verður til Alþingis laugardaginn 30. nóvember.

„Við fórum strax í það í fjármálaráðuneytinu að miða við það ef þingið hefði hug á því reyna ljúka því 15. nóvember hvernig við þyrftum þá að spóla tímann aftur og hvaða tímaramma við hefðum. Á þessum ríkistjórnarfundi var ég því með fjáraukafrumvarp, frumvarp um kílómetragjöld, bandorm tvö, frumvarp varðandi stuðningslán til Grindavíkur og fleiri fjárlagatengd mál,“ sagði Sigurður Ingi við mbl.is eftir fund starfstjórnarinnar í dag.

Frétt af mbl.is

„Það eru náttúrulega bara fjárlög“

Sigurður segir að unnið sé hörðum höndum að því geta lokið yfirferð vegna annarrar umræðu fjárlaga og hann vonast til þess að geta verið með það til umræðu í ríkisstjórn á þriðjudaginn. Það þýði að hægt verði að koma öllum gögnum til fjárlaganefndar og efnahags- og viðskiptanefndar á eins góðum tíma og hægt er.

Fundaði með öllum formönnum

„Ég hafði frumkvæði að því að boða formenn allra stjórnmálaflokka til samtals um þetta í gær og ég gat ekki betur heyrt en það væru allir samstíga í því að það væri eðlilegt að reyna að afgreiða fjárlögin og fjárlagatengd mál. En það kannski ekki mikill hugur í að afgreiða mörg önnur mál sem ég hef fullan skilning á við þessar tímaaðstæður,“ segir Sigurður.