Magnús Þór Jónsson, formaður Kennarasambands Íslands, er að vonum ánægður með úrskurð Félagsdóms í morgun um að verkfallsboðun kennara sé lögmæt.

Fundur hefur verið boðaður í kjaradeilu Kennarasambands Íslands og Sambands íslenskra sveitarfélaga hjá ríkissáttasemjara klukkan 13 í dag.

Frétt af mbl.is

Verkfallsboðun kennara lögmæt

Fögnum niðurstöðunni

„Við töldum okkar hafa farið að öllum þeim lögum og reglum sem gilda um vinnustöðvanir og höfum verið með skýran málflutning og markmið í langan tíma,“ segir Magnús Þór, sem ræddi við blaðamann í húsi Landsréttar þar sem úrskurður Félagsdóms var kveðinn upp.

„Við fögnum því að Félagsdómur hafi staðfest að við höfðum rétt fyrir okkur þar.“

Mikið ber á milli 

Spurður hvað taki núna við segir hann að betra hefði verið að verja tímanum í að tala saman en að það sé hluti af vinnudeilum að þær fari fyrir félagsdóm.

„Það er boðaður fundur klukkan 13 á eftir hjá ríkissáttasemjara. Við mætum bara þangað og leggjum af stað inn í verkefnið,“ segir Magnús Þór og nefnir að enn þá beri mikið á milli í kjaradeilunni.

„Það ber mikið á milli. Við erum að vísa í verkefni sem er búið að vera í gangi síðan 2016. Við horfum til þess að það samkomulag sem var gert þar um jöfnun lífeyrisréttinda og jöfnun launa sé verkefni sem við viljum vinna að.“

Ertu bjartsýnn á að deilan leysist í tæka tíð?

„Verkefnið er stórt en það er þannig í þessum málum að þegar menn setjast yfir hlutina þá stundum ganga þeir hraðar fyrir sig en maður reiknaði með. Við erum einbeitt og ætlum að komast langt í þessu og við sjáum hvað næstu dagar gefa.“