Spáð er allhvassri norðvestanátt með snjókomu eða slyddu á norðanverðu landinu í dag. Færð getur spillst á fjallvegum norðan til og skyggni orðið mjög lítið, að því er segir í athugasemd veðurfræðings á Veðurstofu Íslands.

Frétt af mbl.is

Vara við hríðarveðri

Í fyrramálið gengur í suðaustan storm með talsverðri rigningu og hlýnar í bili. Skilin fara hratt til norðausturs og stendur veðrið yfir í nokkra klukkutíma í hverjum landshluta.

Um hádegi snýst í hægari suðvestanátt með skúrum, fyrst vestast og verða skilin farin yfir landið undir kvöld og styttir þá upp norðaustan til. Jafnframt kólnar og gæti úrkoma sunnan og vestan til farið yfir í slydduél á láglendi.

8-18 metrar á sekúndu

Veðurspáin er annars á þann veg að það gengur í norðan- og norðvestan 8 til 18 metra á sekúndu í dag, hvassast verður við norðausturströndina. Snjókoma eða slydda verður á norðanverðu landinu, skúrir eða slydduél suðvestan til, en bjart suðaustanlands. Dregur úr vindi og styttir upp í kvöld og kólnar í veðri.

Vaxandi suðaustanátt verður seint í nótt, fyrst vestast, 18-25 m/s og talsverð rigning í fyrramálið, hvassast verður við fjöll. Mun hægari vindur annars og þurrt. Hlýnandi veður í bili. Snýst í suðvestan 10-18 m/s með skúrum og síðar jafnvel slydduéljum um hádegi, fyrst vestan til og fer að kólna. Léttir til norðaustan- og austanlands undir kvöld.

Veðurvefur mbl.is