CERT-IS, netöryggissveit Fjarskiptastofu, hefur síðustu daga aðstoðað Alþingi og ríkislögreglustjóra við að undirbúa og skipuleggja viðbrögð við mögulegum netárásum í kringum fundinn.

Þar koma saman 87 þingmenn Norðurlandaráðs, forsætisráðherrar, utanríkisráðherrar og samstarfsráðherrar Norðurlanda ásamt öðrum ráðherrum Norðurlandanna.

Svipar til leiðtogafundarins

Guðmundur Arnar Sigmundsson forstöðumaður CERT-IS segir í samtali við Morgunblaðið að samkvæmt áhættumati ríkislögreglustjóra og CERT-IS séu málefnin til umræðu á dagskrá þingsins þess háttar að þau gætu beint sjónum netglæpamanna að Íslandi og þykir því aukin hætta á árásum á íslenskar netsíður, eins og á leiðtogafundi Evrópuráðsins í Reykjavík í maí í fyrra.

Á þeim fundi var óvissustigi almannavarna lýst yfir vegna netárása sem mátti tengja við fundinn. Árásirnar voru meðal annars gerðar á heimasíðu Alþingis, stjórnarráðsins og CERT-IS.

Þessar netárásir voru raktar til hóps rússneskra tölvuþrjóta.

„Við erum búin að vera að stilla strengi hjá öllum rekstraraðilum mikilvægra innviða til að vera á tánum, hafa réttan mannskap þegar, og ef, eitthvað gerist samhliða þessu þingi,“ segir Guðmundur.

Lesa má meira um málið í Morgunblaðinu í dag