Núverandi loforð heimsins vegna loftslagsvandans myndu aðeins draga úr útblæstri gróðurhúsalofttegunda um 2,6 prósent fyrir árið 2030, að sögn Sameinuðu þjóðanna. Það er aðeins brot af því sem þörf er á til að koma í veg fyrir verstu mögulegu áhrif vegna hlýnunar jarðar.

Þetta kemur fram í nýrri skýrslu stofnunarinnar. 

Simon Stiell, yfirmaður loftslagsmála hjá Sameinuðu þjóðunum, sagði að skuldbindingar þjóða heims væru „víðsfjarri“ 43 prósenta minnkuninni sem þörf væri fyrir á þessum áratug til að draga úr hlýnun jarðar um 1,5 stig og „koma í veg fyrir að hlýnun jarðar lami efnahag þjóða og eyðileggi líf og lífsviðurværi milljarða manna víðs vegar um heiminn”.

„Niðurstöður skýrslunnar eru afdráttarlausar en koma ekki á óvart,” sagði Stiell.